ភ្នំពេញ៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរា​ជា​ណា​ចក្រ​កម្ពុជា ថ្នាក់ដឹកនាំ សមាជិក សមាជិកា នៅថ្ងៃទី១២ ខែសីហា ឆ្នាំ​២០២៤​នេះ បានចេញប្រកាសថ្កោលទោស ប្រឆាំងយ៉ាង ដាច់អហង្ការ ចំពោះទង្វើ​ទាំងឡាយ ដែលបង្កឡើងដោយក្រុមឧទ្ទាមក្រៅច្បាប់នៅក្រៅប្រទេស ដូចជា​គម្រោង​ បង្កើតរដ្ឋាភិបាលក្រៅច្បាប់ និងសកម្មភាពញុះញង់ ប្រឌិតព័ត៌មាន​ភូត​កុហក បោកប្រាស់គ្រប់រូបភាព ដល់មតិ សាធារណៈ ដើម្បីប៉ុនប៉ងផ្តួលរំលំរាជរដ្ឋា​ភិបាល​ស្របច្បាប់ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋ​មន្ត្រី នៃព្រះរាជាណាចក្រកម្ពុជា។

ការប៉ុនប៉ងរបស់ក្រុមឧទ្ទាមក្រៅច្បាប់ ក្នុងគោលបំណងផ្តួលរំលំ​រាជរដ្ឋាភិបាល​ស្របច្បាប់ ដែលប្រសូត ចេញពីការបោះឆ្នោត គឺជាទង្វើបំពានច្បាប់ធ្ងន់ធ្ងរបំផុត ប្រឆាំងនឹងរដ្ឋធម្មនុញ្ញនៃព្រះរាជាណាចក្រកម្ពុជា ជា ពិសេសប្រឆាំងឆន្ទៈពលរដ្ឋ និងមានចេតនាបំផ្លិចបំផ្លាញសុខសន្តិភាព ដែលឥស្សរជនថ្នាក់ដឹកនាំកម្ពុជា មាន សម្តេចអគ្គមហាសេនាបតីតេជោ ហ៊ុន សែន ដែលជាស្ថាបនិកមគ្គទេសក៍ឯក និង​ជាប្រតិបត្តិករនយោបាយ ឈ្នះ-ឈ្នះ បានយកសាច់ស្រស់ឈាមស្រស់ទៅប្តូរ ក្នុងការនាំមកនូវសុខសន្តិភាព និងការអភិវឌ្ឍ ដែលកម្ពុជា ទទួល​បាននាពេល​បច្ចុប្បន្ននេះ។

ថ្នាក់ដឹកនាំ ស​មាជិក សមាជិការដ្ឋសភានៃព្រះរាជាណាចក្រកម្ពុជា គោរពយ៉ាង​ម៉ឺងម៉ាត់ ចំពោះឆន្ទៈប្រជា ពលរដ្ឋចំនួនជាង៨៤% ដែលបានចេញទៅបោះ​ឆ្នោត​ជ្រើសរើសថ្នាក់ដឹកនាំរបស់ខ្លួន តាមរយៈការបោះឆ្នោត កាលពីថ្ងៃទី២៣ ខែកក្កដា ឆ្នាំ២០២៣ នៅក្នុងចំណោមគណបក្សនយោបាយចំនួន១៨ ហើយបានបោះឆ្នោត ជ្រើសរើសគណបក្សចំនួនពីរ។ ជាលទ្ធផលប្រជាពលរដ្ឋបានបោះឆ្នោត​ជូន​គណបក្ស​ប្រជាជនកម្ពុជាយ៉ាងលើស លប់ ក្នុងចំនួនជាង៨២% ដោយទទួល​បាន១២០អាសនៈ នៅក្នុងរដ្ឋសភា។

ថ្នាក់ដឹកនាំ សមាជិក សមាជិការដ្ឋសភានីតិកាលទី៧ បាននិងកំពុងបំពេញមុខងារ​របស់ខ្លួនយ៉ាងសកម្ម ស្របតាមរដ្ឋធម្មនុញ្ញក្នុងការបម្រើប្រជាពលរដ្ឋ​និងការពារ​ផលប្រយោជន៍ប្រជាពលរដ្ឋជាម្ចាស់ឆ្នោត។ ការបង្កើត រាជរដ្ឋាភិបាលនៅកម្ពុជា មិនអាចប្រព្រឹត្តទៅតាមរូបភាពណាមួយ ក្រៅពីការបោះឆ្នោតជាសកលពី​ប្រជា​ពលរដ្ឋ ផ្ទាល់ ដោយត្រឹមត្រូវ យុត្តិធម៌ តាមលទ្ធិប្រជាធិបតេយ្យ សេរី ពហុបក្ស ស្របតាមរដ្ឋធម្មនុញ្ញ ដូចដែលបានអនុវត្ត យ៉ាងខ្ជាប់ខ្ជួនចំនួន៧អាណត្តិ មកហើយ នោះបានឡើយ។

សូមប្រកាសថ្កោលទោស ប្រឆាំងយ៉ាងដាច់អហង្ការ ចំពោះទង្វើទាំងឡាយ ដែល​បង្ក​ឡើងដោយក្រុមឧទ្ទាមក្រៅច្បាប់នៅក្រៅប្រទេស ដូចជា គម្រោងបង្កើត​រដ្ឋា​ភិបាលក្រៅច្បាប់ និងសកម្មភាពញុះញង់ ប្រឌិតព័ត៌មានភូតកុហក បោកប្រាស់​គ្រប់រូបភាព ដល់មតិសាធារណៈ ដើម្បីប៉ុនប៉ងផ្តួលរំលំរាជរដ្ឋាភិបាលស្របច្បាប់​ដឹកនាំដោយ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណា​ចក្រកម្ពុជា។